Dette vil effektivisere saksbehandlinga og setje DMP i stand til å utnytte europeiske system og prosessar betre, i første omgang knytt til legemiddel til menneske. Den nye plattforma gir større moglegheiter til å effektivisere saksbehandlinga vår. Metadata frå innsendinga vil bli nytta til automatisk oppretting av saker og val av saksflyt.
Samtidig stiller dette krav til at søkjar følgjer retningslinjene for utfylling av filer som følgjer med ei innsending.
– At vi får korrekte data frå starten, gjer at resten av saksbehandlingsprosessen følgjer riktig spor. seier prosjekteigar og områdedirektør Randi Tandle.
Vi ber selskapa om å formidle dette internt i og mellom sine organisasjonar.
Krevjande overgangsfase
DMP gjekk over til ny plattform 17. september. I forkant vart alle avslutta og pågåande saker overførte frå det føregåande systemet til den nye plattforma. DMP ber legemiddelindustrien vere merksame og gi beskjed dersom noko verkar feil, til dømes feilsende e-postar.
– Overgangen til eit nytt system er krevjande. Vi må rekne med noko redusert kapasitet, og at det dermed òg kan bli enkelte forseinkingar i ein periode. Samstundes er dette ei stor og viktig investering for DMP som kan gje gevinstar for både oss og industrien, avsluttar Tandle.